Mga Huwarang Bayani

Lapu-lapu

Si Lapu-lapu ang kauna-unahang pinunong Pilipinong lumaban sa mga mananakop na Kastila. Pinamumunuan ni Magallanes ang unang pangkat ng mga Kastilang nagtangkang sumakop sa kapuluan. Nang dumating siya kasama ng kanyang mga sundalo sa pulo ng Mactan, magiting na ipinagtanggol ni Lapulapu at ng kanyang mga tauhan ang kalayaan nila. Napatay si  Magallanes sa labanang iyon kaya't itinanghal na unang bayaning Pilipino si Lapu-lapu ng bansa.

Jose Rizal

Si Rizal ang pambansang bayani ng Pilipinas. Dalawang kilalang nobela ang sinulat niya - ang Noli Me Tangere at El Filibusterismo. Inilarawan niya sa dalawang nobelang ito ang kawalang-katarungan at pagmamalupit ng mga Kastila sa mga Pilipino. Binigyang-diin din niya ang pag-ibig sa bayan at ang kinakailangang kalayaan ng ating bansa. Hindi naibigan ng mga Kastila ang isinulat niya kaya't ikinulong siya at binaril sa Bagumbayan. Rizal Park o Luneta na ang tawag ngayon sa Bagumbayan.

Bata pa lamang si Rizal ay kinakitaan na siya ng katalinuhan. Tatlong taong gilang pa lamang siya nang matutong bumasa. Kartilya ang kanyang unang aklat na may mga alpabeto at dasal. Kinagigiliwan niyang makinig sa kanyang ina habang tinuturuan nito ang kanyang mga kapatid.

Apolinario Mabini

Isang napakatalinong tao at may napakatibay na paninidigan si Apolinario Mabini. Kahit paralitiko siya, sumulat siya ng isang sanaysay hinggil sa mga tungkulin ng mga mamamayan sa Diyos, sa bayan, at sa kanyang kapwa-tao. naging tagapayo siya ni Heneral Emilio Aguinaldo noong panahon ng Digmaang Pilipino-Amerikano. Tinawag siyang Utak ng Himagsikan.

Emilio Aguinaldo

Si Heneral Emilio Aguinaldo ang unang pangulo ng Unang Rebolusyonaryong Republika ng Pilipinas. Sa kanyang tahanan unang itinaas ang bandila ng Pilipinas noong Hunyo 12, 1898. Ito ang araw nang ipinahayag niya ang kalayaan ng Pilipinas mula sa España.

Andres Bonifacio

Si Andres Bonifacio ang nagtatag ng Katipunan. Ang Katipunan ay ang samahan ng mga Katipunero. Ang mga Katipunero ay ang mga Pilipinong lumaban sa mga Kastila sa pamamagitan ng sandata o himagsikan. Gusto nilang maging malaya ang mga Pilipino mula sa España.

Melchora Aquino

Si Melchora Aquino ay kilala rin sa pangalang Tandang Sora. Tinulungan niya ang mga Katipunero. Binigyan niya sila ng pagkain at tirahan. Inalagaan pa niya ang mga may sakit at sugatang Katipunero. Isa iyang matapang na Pilipino.

Mga Di-kilalang Sundalo

Libu-libo ang mga di-kilalang sundalong Pilipino. Inialay nila ang kanilang buhay sa pagsisilbi para sa Inang Bayan at mga kababayan. Nagbuwis sila ng buhay dahil sa pagmamahal nila sa bansa. Ang kanilang kagitingan ay idinambana sa mga puso ng lahat ng Pilipinong mapagmahal sa kalayaan.

Sila ay ilan lamang sa mga bayaning Pilipino. Ipinagmamalaki ng mga Pilipino ang kanilang kagitingan.

Heto na naman , tag ulan na naman , anong sakit kaya?

SINABI ng Philippine Atmospheric, Geophysical and Astronomical Services Administration (PAGASA) na tatlong bagyo ang nakaambang tumama sa Pilipinas. Nagbigay ng babala ang PAGASA na maaaring manalasa ang bagyo sa pagbubukas ng klase. Kaya nananawagan ang PAGASA sa taumbayan na mag-ingat.

Nararamdaman na ang sinasabi ng PAGASA. Pumasok na ang tag-ulan at naghahatid na naman ng takot sa mamamayang nakatira sa mabababang lugar hindi lamang sa Metro Manila kundi sa mga nasa probinsiya. Mayroong mga lugar na kaunting buhos lamang ng ulan ay umaapaw na ang baha. At matagal bago lumiit ang tubig. Karaniwan na ang ganitong tanawin sa CAMANAVA area.

Ang isang nakatatakot kapag may baha ay hindi lamang ang bantang tangayin ang ari-arian at may malunod kundi ang mga sakit na nakukuha rito. Karaniwan nang ang mga sakit na nakukuha sa baha ay ang leptospirosis. Ang leptospirosis ay sakit na nanggaling sa tubig na kontaminado ng ihi ng daga. Kapag ang isang taong may sugat sa binti at paa ay lumusong sa tubig baha, ang leptospira virus ay doon papasok at makararanas ng lagnat, pananakit ng kalamnan, ulo at maaaring maapektuhan ang kidney, atay at utak. Mula January hanggang April 2006 111 kaso ng leptospirosis ang naireport. Ipinapayo sa mga lulusong sa tubig-baha na magsuot ng bota para maiwasan ang leptospirosis.

Ang dengue ay isa rin sa mga kinatatukutang sakit na nananalasa sa panaho ng tag-ulan. Ang dengue ay hatid ng lamok na Aedes Aegypti na umaatake o nangangagat kung araw. Paboritong tirahan ng mga lamok na may dengue ang mga nakatingggal na tubig at mga nakasabit na bagay na nasa madilim na lugar. Karaniwang nasa mga paso, bote, goma at iba pang lalagyan na may tubig nakatira ang mga lamok.

Sintomas ng dengue ang mataas na lagnat na tumatagal ng pitong araw, pananakit ng kalamnan at kasu-kasuan, panghihina at pagkakaroon ng mga pantal. Kapag malala na ang dengue, maaaring makaranas ng pagdurugo ang biktima at maaaring ikamatay kapag hindi naagapan.

Hindi lamang ang dengue at leptospirosis ang mga sakit na umaatake kung panahon ng tag-ulan kaya nararapat ang pag-iingat. Nararapat na maging malinis sa kapaligiran upang mapigilan ang pagkalat ng mga daga at lamok na naghahatid ng sakit. Nararapat din namang magsagawa ng kampanya ang Department of Health kung paano lubusang makaiiwas sa sakit ang taumbayan. Kung sa DOH manggagaling ang paalala, mas maganda. Kawawa naman ang taumbayan kung magkakasakit pa sa panahong ito.